![](https://mmdbnchannel.com/wp-content/uploads/2025/02/89.jpg)
မန်းရွှေစက်တော် ဘုရားပွဲတော် ကျင်းပ
၇၅ ရက်ကြာ ကျင်းပမည့် မကွေးတိုင်းဒေသကြီး မင်းဘူး၊ စကု မြို့နယ်အတွင်းရှိ မန်းရွှေစက်တော် ဘုရားပွဲတော်ကို ဖေဖော်ဝါရီ ၂ ရက် (ယနေ့) က အစဉ်အလာမပျက် စတင်ဖွင့်လှစ်ခဲ့ပြီး ပုံမှန်ထက် ဆိုင်ခန်းနှင့် တည်းခိုဆောင် (တဲကျောင်း) များ လျော့ကျခဲ့ကြောင်း သိရသည်။
မန်းရွှေစက်တော် ဘုရားပွဲတော်ကို နှစ်စဉ် တပို့တွဲလဆန်း ၅ ရက်နေ့မှ မြန်မာနှစ်ဆန်း တစ်ရက်နေ့ အထိ ကျင်းပလေ့ ရှိကြောင်း ပွဲတော်ဖွင့်ပွဲနေ့တွင် အောက်စက်တော်ရာ နှင့် အထက်စက်တော်ရာတို့ကို ဖွင့်လှစ် အပူဇော်ခံလေ့ရှိကြောင်း ပုံမှန်အားဖြင့် ရွှေစက်တော်ပွဲတော်ချိန်တွင် တည်းခိုဆောင် (တဲကျောင်း) ပေါင်း ၅၀၀ ကျော်နှင့် ဆိုင်ခန်းပေါင်း ၁၀၀၀ နီးပါး တည်ဆောက်လေ့ရှိသော်လည်း ယခုနှစ်တွင် ဆိုင်ခန်းနှင့် တဲကျောင်းအရေအတွက် ထက်ဝက်ကျော် လျော့ကျခဲ့ကြောင်း သိရသည်။
” ပွဲတော်ကို ပုံမှန်ကျင်းပနေကျအတိုင်း အစဉ်အလာမပျက် ဖွင့်လှစ်ခဲ့ပါတယ်။ ဖွင့်ပွဲနေ့မှာ ဘုရားဖူးလာရောက်သူ နည်းပါးပေမယ့် နယ်ဝေးကနေ ကားကြီးတွေနဲ့ လာရောက်ကြသူတွေလည်း ရှိပါတယ်။ တဲကျောင်းတစ်ချို့လည်း ခု ဖွင့်ပွဲရက်မှာမှ တည်ဆောက်နေကြတာလည်း ရှိပါတယ် “ဟု ရွှေစက်တော်ဘုရား ဂေါပကအဖွဲ့ဝင်တစ်ဦးက ပြောကြားသည်။
![](https://mmdbnchannel.com/wp-content/uploads/2025/02/87.jpg)
![](https://mmdbnchannel.com/wp-content/uploads/2025/02/88.jpg)
မန်းရွှေစက်တော်ဘုရားပွဲတော်ကို နှစ်စဉ် မြန်မာနှစ်ဆန်း တစ်ရက်နေ့တွင် ပိတ်ပွဲ ကျင်းပလေ့ရှိကြောင်း ပွဲတော် ပိတ်ပွဲနေ့ တွင် အောက်စက်တော်ရာနှင့် အထက်စက်တော်ရာတို့ကို ပြန်လည် ပိတ်ထားလေ့ရှိကြောင်း မန်းချောင်း၏ ဝဲဘက်နံဘေး ဓမ္မာရုံအတွင်း တည်ရှိသည့် အောက်စက် တော်ရာကို အလင်းပေါက် ဖန်အုပ်ဆောင်းဖြင့် ဖုံးအုပ်ထားသောကြောင့် ပွဲတော် ချိန်ပြင်ပတွင်လည်း အောက်စက်တော်ရာကို မြင်တွေ့ဖူးမြော်နိုင်ကြောင်း သိရသည်။