တပ်မတော်အရာရှိ ဆရာဝန်ဆေးမှူးများသည် နိုင်ငံတော်ကာကွယ်ရေး စွမ်းပကားမြင့်မားစေရန် တစ်ဖက်တစ်လမ်းက အထောက်အကူပြုကြောင်း တပ်ချုပ်ပြောကြား

တပ်မတော်အရာရှိ ဆရာဝန်ဆေးမှူးများအနေဖြင့် နိုင်ငံတော်ကာကွယ်ရေးစွမ်းပကား မြင့်မားရေးတွင် အထောက်အကူ ပြုလျက်ရှိသည်ကို နစက ဥက္ကဋ္ဌ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် မှ ဒီဇင်ဘာ ၁၈ ရက် နံနက်ပိုင်းက ပြုလုပ်သည့် တပ်မတော်ဆေးတက္ကသိုလ်၊ ဗိုလ်လောင်းသင်တန်းအမှတ်စဉ်(၂၅) သင်တန်းဆင်း ဂုဏ်ပြု စစ်ရေးပြအခမ်းအနားတွင် ထည့်သွင်းပြောကြားခဲ့သည်။

တပ်မတော်အရာရှိ ဆရာဝန်ဆေးမှူးများ၏ ကျွမ်းကျင်မှုနှင့် ကျန်းမာရေးစောင့်ရှောက်ပေးမှုများသည် တပ်မတော်သားများ၏ ကျန်းမာကြံ့ခိုင်ရေးအတွက် အလွန်အရေးကြီးသည့်တာဝန်တစ်ရပ်ဖြစ်ပြီး တပ်မတော်အင်အားတောင့်တင်းခိုင်မာရေးအတွက် အခြေခံလိုအပ်ချက်ဖြစ်သည်ဟု ပြောသည်။

” တပ်မတော်အရာရှိ ဆရာဝန်ဆေးမှူးတွေဟာ နိုင်ငံတော်ကာကွယ်ရေးစွမ်းပကားမြင့်မားစေဖို့အတွက်လည်း တစ်ဖက် တစ်လမ်းက အထောက်အကူပြုပါတယ်။ တိုက်ပွဲဝင်စစ်သည်တိုင်း တိုက်စွမ်းရည်မြင့်မားရေးအတွက် ရုပ်ပိုင်းဆိုင်ရာ၊ စိတ်ပိုင်းဆိုင်ရာ ကျန်းမာကြံ့ခိုင်ရေးဟာ အထူးလိုအပ်တာကြောင့် သင်ယူတတ်မြောက်ထားတဲ့ ဆေးပညာရပ်တွေကို အသုံးချပြီး နေရာဒေသမရွေး၊ အချိန်အခါမရွေး လုံလောက်သည့် ကျန်းမာရေးစောင့်ရှောက်မှုတွေ ပေးသွားကြရပါမယ် “ဟု ဗိုလ်ချုပ်မှူးကြီးမင်းအောင်လှိုင်က မှာကြားသည်။

ထို့ပြင် တပ်မတော်သားဆရာဝန်များဖြစ်၍ လိုအပ်လာပါက ခြေလျင်စစ်သည်များနှင့်အတူ နိုင်ငံတော်ကာကွယ်ရေး နှင့်လုံခြုံရေးအတွက် စစ်ဆင်ရေးတာဝန်များကိုပါ ထမ်းဆောင်ကြရမည်ဖြစ်သောကြောင့် အမိန့်နာခံမှုကောင်းပြီး စစ်ပညာများကိုအသုံးချတတ်သည့် စစ်ခေါင်းဆောင်များဖြစ်အောင်ကြိုးစားကြရန်လည်း မှာကြားခဲ့သည်။

” ဆေးကုသရေးတာဝန်ထမ်းဆောင်ချိန်မှာ ဆေးပညာရပ်တွေကိုအသုံးချပြီး လူနာတွေအပေါ်မှာ ကောင်းမြတ်တဲ့စေတနာ၊ မွန်မြတ်တဲ့စိတ်ထား၊ ပြည့်ဝတဲ့အကြင်နာမေတ္တာတရားတွေနဲ့ တာဝန်ထမ်းဆောင်ကြရမှာဖြစ်သလို စစ်ဆင်ရေးနဲ့ လုံခြုံရေးတာဝန်များထမ်းဆောင်ချိန်မှာလည်း သင်ကြားပေးလိုက်သည့် စစ်ပညာရပ်တွေကိုအသုံးချပြီး “တပ်မတော်၏အစဉ်အလာကို အသက်ပေးစောင့်ထိန်းလိုသည့်စိတ်ဓာတ်”နဲ့တာဝန်ထမ်းဆောင်သွားကြရပါမယ်”ဟု ဗိုလ်ချုပ်မှူးကြီးမင်းအောင်လှိုင်က မှာကြားသည်။

ထို့ပြင် လက်ရုံးရည်၊ နှလုံးရည်ပြည့်ဝသည့် တပ်မတော်သား ဆရာဝန်၊ ခေါင်းဆောင်ငယ်များအဖြစ် နိုင်ငံတော်နှင့် တပ်မတော်က အားကိုးအားထားပြုရသည့် ဆေးဝန်ထမ်းတပ်ဖွဲ့၏အနာဂတ်တာဝန်များကို ပခုံးပြောင်းတာဝန်ယူ ဆောင်ရွက်နိုင်မည့် “သမားဇာနည် အောင်စစ်သည်”များဖြစ်အောင် အထူးကြိုးစားကြရန်လည်း မှာကြားခဲ့သည်။