သရုပ်ဆောင် ဥက္ကာမင်းမောင်က သူ့ကိုယ်စား မိခင်ဖြစ်သူ အကယ်ဒမီပွဲတက်မည်ဟု အသိပေး
ဒီနှစ် အကယ်ဒမီဆန်ကာတင်ဇာတ်ကားထဲမှာ ပါဝင်နေတဲ့ ပြည်ပရောက် ရုပ်ရှင်သရုပ်ဆောင်တစ်ယောက်ဖြစ်သူ ဥက္ကာမင်းမောင်က သူ့ကိုယ်စား မိခင်ဖြစ်သူ အကယ်ဒမီပွဲတက်မယ်ဆိုပြီး သူ့ရဲ့လူမှုကွန်ရက်စာမျက်နှာကနေ အသိပေးထားပါတယ်။
❝အကယ်ဒမီဖိတ်စာရပါပြီခင်ဗျာ.. မေကြီးက ကျွန်တော့်ကိုယ်စားပွဲတက်ပါလိမ့်မယ်.. ရုပ်ရှင်အစည်းအရုံးမှ တာဝန်ရှိသူများကိုလဲ ဖိတ်စာစီစဥ်ပေးတဲ့အတွက် ကျေးဇူးအထူးတင်ရှိပါတယ်ခင်ဗျာ..❞ ဆိုပြီး ရေးသားထားသလို❝မေကြီးက Gay တစ်ယောက်ရဲ့ မိခင်အနေနဲ့ LGBT ကိုယ်စားပြု မြန်မာ ဝတ်စုံကို ဝတ်ဆင်ပြီး ပွဲတက်မှာပါ.. ဒီဇိုင်း နဲ့ အိုင်ဒီယာက ကျွန်တော်ကိုယ်တိုင်မေကြီးအတွက်ဒီဇိုင်းဆွဲပြီး ဒီဇိုင်နာ မစုစုခိုင်ရဲ့ ကိုယ်ပိုင် အိုင်ဒီယာနဲ့ပေါင်းစပ်ပြီး ဖန်တီးထားတာ..❞ လို့လည်း ရေးသားထားပါတယ်။
ဒါ့အပြင် ဥက္ကာမင်းမောင်က ❝တနိုင်ငံလုံးက LGBT မိဘတွေအတွက်လဲ ကိုယ့် သားသမီးက LGBT ဖြစ်လာရင် အောင်မြင်ရေး လမ်းကြောင်းပေါ်ရောက်အောင် တွန်းပို့ပေးဖို့ နဲ့ ကိုယ့်သားသမီးက Gay ဖြစ်နေပေမယ့် ကိုယ့်သားရဲ့ဖြစ်တည်မှုကို အပြည့်အဝ Support လုပ်ပေးတဲ့ အနေနဲ့ တနိုင်ငံလုံးက မိဘတွေကိုလဲ ကိုယ့်သားသမီး LGBT ဖြစ်နေခြင်းကို လက်ခံပေးဖို့ ရည်ရွယ်ပြီး အဓိပ္ပါယ်တွေအပြည့်နဲ့ ဒီအိုင်ဒီယာလေး လုပ်ဖြစ်သွားတာပါ.. ❞ လို့လည်း ဆိုပါတယ်။
အလားတူပဲ အကယ်ဒမီပေးပွဲကို သူကိုယ်တိုင် မြန်မာပြည်ပြန်ပြီး ပွဲမတက်တာဟာ မလေးစားလို့လုံးဝမဟုတ်ဘဲ ပန်ဆယ်လို (အမေရိကန်ရောက် အကြမ်းဖက်ထောက်ပို့လုပ်နေသူ) နဲ့ ဂယက်တွေစဖြစ်ကတည်းက သူအပါအဝင် သူ့မိသားစုရဲ့ အသက် အန္တရာယ်ကို ခြိမ်းခြောက်ခံရတာကြောင့် မြန်မာပြည်ကို ပွဲတက်ဖို့ မပြန်လာဖြစ်ကြောင်းကိုလည်း ရှင်းပြထားပါသေးတယ်။
ယခုနှစ်ပြုလုပ်မယ့် အကယ်ဒမီဆုပေးပွဲအတွက် ဆန်ကာတင်ရွေးချယ်ထားတဲ့ ရုပ်ရှင်ကား ၁၈ ကားထဲမှာ ဥက္ကာမင်းမောင် ပါဝင်သရုပ်ဆောင်ထားတဲ့ ❝မရဲ့ အေးခဲသွားကြသူများ❞ ရုပ်ရှင်ကားလည်း ပါဝင်နေတယ်လို့ သိရပါတယ်။
