ဆဋ္ဌမအကြိမ်မြောက် ဘင်းမ်စတက် ထိပ်သီးအစည်းအဝေး စတင်
အိန္ဒိယ၊ မြန်မာ၊ ထိုင်းနှင့် အခြား နိုင်ငံ့ခေါင်းဆောင်များပါဝင်ဆွေးနွေးမည့် ဆဋ္ဌမအကြိမ်မြောက် ဘင်းမ်စတက်ထိပ်သီးအစည်းအဝေး စတင်နေပြီဖြစ်ကြောင်း သိရသည်။ အစည်းအဝေးမစတင်မီ မြန်မာ့ငလျင်ဘေးကြောင့် အသက်ဆုံးရှုံးခဲ့ရသော ထိုင်းနှင့် မြန်မာ နှစ်နိုင်ငံ ပြည်သူများအတွက် ဝမ်းနည်းဆုတောင်းမှုအဖြစ် တစ်မိနစ် ငြိမ်သက်မှုလည်း ပြုခဲ့သည်။
ဘင်းမ်စတက်ထိပ်သီးအစည်းအဝေးကို နစကဥက္ကဋ္ဌနှင့်အတူ အိမ်ရှင် ထိုင်းနိုင်ငံဝန်ကြီးချုပ် ပေတုံတန်၊ အိန္ဒိယဝန်ကြီးချုပ် နာရင်ဒရာမိုဒီတို့နှင့်အတူ ဘင်္ဂလားဒေ့ရှ်၊ ဘူတန်၊ နီပေါ၊ သီရိလင်္ကာနိုင်ငံတို့မှ နိုင်ငံ့ ခေါင်းဆောင်များလည်း တက်ရောက်နေသည်။
၁၉၉၇ ခုနှစ်က ဘန်ကောက်မြို့တွင် တည်ထောင်ခဲ့သောဘင်္ဂလားပင်လယ်အော် စီးပွားရေးနှင့် နည်းပညာဆိုင်ရာ ဘက်စုံပူးပေါင်းဆောင်ရွက်ရေးအဖွဲ့အစည်း ဘင်းမ်စတက်(BIMSTEC) သည် ဘင်္ဂလားပင်လယ်အော်နှင့်နယ်နိမိတ်ချင်းထိစပ်နေသော နိုင်ငံများအကြား စီးပွားရေးပူးပေါင်းဆောင်ရွက်မှုကို နက်ရှိုင်းစေရန် ရည်ရွယ်ထားသည်။ ၎င်းသည် တောင်အာရှနှင့် အရှေ့တောင်အာရှကြား စီးပွားရေး၊ လူမှုရေးနှင့် ယဉ်ကျေးမှုဆက်သွယ်မှုများကို မြှင့်တင်ပေးသည့် တံတားတစ်ခုအဖြစ် ဆောင်ရွက်ပေးသည်။ ထိပ်သီးအစည်းအဝေးအတွင်း အဖွဲ့ဝင်နိုင်ငံများသည် သံတမန်ရေးရာနှင့် စီးပွားရေးဆက်ဆံရေးများကို ခိုင်မာစေရန် နှစ်နိုင်ငံသဘောတူညီချက်များ ချုပ်ဆိုမည်ဖြစ်သည်။ ဘန်ကောက်တွင် ယခု ကျင်းပသည့်ဆဋ္ဌမအကြိမ်မြောက် ထိပ်သီးအစည်းအဝေးသည် ပင်လယ်ရေးရာပူးပေါင်းဆောင်ရွက်မှု၊ ရေရှည်တည်တံ့ခိုင်မြဲသောဖွံ့ဖြိုးတိုးတက်မှုနှင့် ဒေသတွင်းဆက်သွယ်ရေးတို့ကို အဓိကထားဆွေးနွေးမည်ဟုလည်း သိရသည်။
ထို့အပြင် လက်ရှိကျင်းပမည့် ဘင်းမ်စတက်အစည်းအဝေးတွင် မြန်မာ့ငလျင်ဘေး အကူအညီပေးရေးအပြင် ဘင်းမ်စတက်ပို့ဆောင်ဆက်သွယ်ရေးပင်မစီမံကိန်း အကောင်အထည်ဖော်မှုနှင့် အိန္ဒိယ- မြန်မာ-ထိုင်း သုံးနိုင်ငံအဝေးပြေးလမ်းမကြီးစီမံကိန်း တိုးတက်မှုရရှိရေးအတွက် ဘင်းမ်စတက်အဖွဲ့ဝင်နိုင်ငံများ ဆက်လက်ပူးပေါင်းဆောင်ရွက်ရေးကိုလည်း ဆွေးနွေးဖွယ်ရှိနေသည်။
အိန္ဒိယ-မြန်မာ-ထိုင်း သုံးနိုင်ငံအဝေးပြေးလမ်းမကြီးစီမံကိန်းမှာ ၇၀ ရာခိုင်နှုန်းခန့်ပြီးစီးနေပြီး မြန်မာနိုင်ငံဘက်မှ တိုက်ပွဲများကြောင့် ဆိုင်းငံ့နေရကာ BIMSTEC Master Plan for Transport Connectivity မှာ BIMSTEC အဖွဲ့ဝင် နိုင်ငံ ၇ နိုင်ငံကို ချိတ်ဆက်သွားလာမှုများတိုးမြှင့်ရန် ရည်ရွယ်ထားပြီး စီမံကိန်းပေါင်း ၂၆၇ ခုပါဝင်ကာ ဒေါ်လာ ၁၂၅ ဘီလျံခန့် အသုံးပြုရမည်ဖြစ်သည်။
ဆဋ္ဌမအကြိမ်မြောက် ဘင်းစ်စတက် (BIMSTEC) အစည်းအဝေးတက်ရောက်ရန် ထိုင်းနိုင်ငံသို့ ရောက်ရှိနေသော နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ယမန်နေ့ညနေပိုင်းက နီပေါဝန်ကြီးချုပ်နှင့် တွေ့ဆုံဆွေးနွေးခဲ့ကာ ယနေ့နံနက်ပိုင်းတွင် အလှည့်ကျဥက္ကဋ္ဌဖြစ်သော အိမ်ရှင် ထိုင်းနိုင်ငံဝန်ကြီးချုပ် ပေတုံတန် ရှင်နာဝပ်ထရာနှင့် တွေ့ဆုံဆွေးနွေးပြီးနောက် အိန္ဒိယဝန်ကြီးချုပ် နာရင်ဒရာမိုဒီနှင့်အတူ ဆက်လက် တွေ့ဆုံဆွေးနွေးခဲ့ကြောင်း သိရသည်။
