ဘင်းမ်စတက်၏ အလှည့်ကျဥက္ကဋ္ဌဖြစ်သော ထိုင်းနိုင်ငံဝန်ကြီးချုပ်နှင့် နစကဥက္ကဋ္ဌတို့ ယနေ့ တွေ့ဆုံဆွေးနွေး

ထိုင်းနိုင်ငံက အိမ်ရှင်အဖြစ် လက်ခံကျင်းပမည့် ဆဋ္ဌမအကြိမ်မြောက် ဘင်းမ်စတက် အစည်းအဝေးသို့ တက်ရောက်ရန်ရောက်ရှိနေသော နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့် ဘင်းမ်စတက်၏ အလှည့်ကျဥက္ကဋ္ဌဖြစ်သော ထိုင်းနိုင်ငံဝန်ကြီးချုပ် ပေတုံတန် ရှင်နာဝပ်ထရာတို့ ယနေ့နံနက်ပိုင်းတွင် တွေ့ဆုံဆွေးနွေးနေကြောင်း သိရသည်။

ဆဋ္ဌမအကြိမ်မြောက် ဘင်းမ်စတ​က်အစည်းအဝေးကို တက်ရောက်ရန် ဗိုလ်ချုပ်မှူးကြီးမင်းအောင်လှိုင်ဦးဆောင်သော အဆင့်မြင့်ကိုယ်စားလှယ်အဖွဲ့က ယမန်နေ့ နေ့လယ်ပိုင်းတွင် ထိုင်းနိုင်ငံသို့ထွက်ခွာရာ ဒွန်မောင်းလေဆိပ်တွင် ထိုင်းအလုပ်သမားဝန်ကြီးက ကော်ဇောနီခင်း ကြိုဆိုခဲ့သလို ညနေပိုင်းတွင် နီပေါနိုင်ငံဝန်ကြီးချုပ်နှင့် တွေ့ဆုံဆွေးနွေးပြီးနောက် ထိုင်းဝန်ကြီးချုပ် ပေတုံတန်က တည်ခင်းဧည့်ခံသောအကြိုညစာစားပွဲကို အခြား ဘင်းမ်စတက်နိုင်ငံ့ခေါင်းဆောင်များနှင့်အတူ တက်ရောက်ခဲ့ကြောင်း သိရသည်။

ထိုင်းနိုင်ငံဝန်ကြီးချုပ်နှင့် SAC ဥက္ကဋ္ဌတို့ နိုင်ငံ့ခေါင်းဆောင်နှစ်ဦးတည်း တွေ့ဆုံသော အစည်းအဝေးတွင် SAC ဥက္ကဋ္ဌက မြန်မာနိုင်ငံ၌ လက်ရှိဖြစ်ပွားနေဆဲဖြစ်သော ငလျင်အရေး၊ အဆိုပါ ငလျင်အရေးအတွက် ထိုင်းနိုင်ငံက ချက်ချင်း ကူညီကယ်ဆယ်ပေးခဲ့မှုအတွက် ကျေးဇူးတင်ရှိကြောင်းနှင့် နှစ်နိုင်ငံအရေးများ ဆွေးနွေးခဲ့သည်ဟု ကနဦးသိရသည်။

ဘင်းမ်စတက်ထိပ်သီးအစည်းအဝေးကို အိန္ဒိယဝန်ကြီးချုပ် နာရင်ဒရာ မိုဒီသည်လည်း ဘင်္ဂလားဒေ့ရှ်၊ ဘူတန်၊ မြန်မာ၊ နီပေါ၊ သီရိလင်္ကာနှင့် ထိုင်းနိုင်ငံတို့ ပါဝင်သော ဒေသဆိုင်ရာအဖွဲ့ဝင်နိုင်ငံတို့မှ ခေါင်းဆောင်များနှင့်အတူ တက်ရောက်မည်ဖြစ်သလိုအိန္ဒိယဝန်ကြီးချုပ်မိုဒီကလည်း SAC ဥက္ကဋ္ဌအား ငလျင်အရေးအတွက် ဖုန်းဆက်သွယ်ပြောဆိုချိန် မကြာမီရက်ပိုင်းအတွင်း ဘင်းမ်စတက်၌ တွေ့ဆုံကြမည်ဟုလည်း ပဏာခံ ဖိတ်ကြားထားသည်။

၁၉၉၇ ခုနှစ်က ဘန်ကောက်မြို့တွင် တည်ထောင်ခဲ့သောဘင်္ဂလားပင်လယ်အော် စီးပွားရေးနှင့် နည်းပညာဆိုင်ရာ ဘက်စုံပူးပေါင်းဆောင်ရွက်ရေးအဖွဲ့အစည်း ဘင်းမ်စတက်(BIMSTEC) သည် ဘင်္ဂလားပင်လယ်အော်နှင့်နယ်နိမိတ်ချင်းထိစပ်နေသော နိုင်ငံများအကြား စီးပွားရေးပူးပေါင်းဆောင်ရွက်မှုကို နက်ရှိုင်းစေရန် ရည်ရွယ်ထားသည်။ ၎င်းသည် တောင်အာရှနှင့် အရှေ့တောင်အာရှကြား စီးပွားရေး၊ လူမှုရေးနှင့် ယဉ်ကျေးမှုဆက်သွယ်မှုများကို မြှင့်တင်ပေးသည့် တံတားတစ်ခုအဖြစ် ဆောင်ရွက်ပေးသည်။ ထိပ်သီးအစည်းအဝေးအတွင်း အဖွဲ့ဝင်နိုင်ငံများသည် သံတမန်ရေးရာနှင့် စီးပွားရေးဆက်ဆံရေးများကို ခိုင်မာစေရန် နှစ်နိုင်ငံသဘောတူညီချက်များ ချုပ်ဆိုမည်ဖြစ်သည်။ ဘန်ကောက်တွင် ယနေ့နှင့် မနက်ဖြန် ကျင်းပမည့်ဆဋ္ဌမအကြိမ်မြောက် ထိပ်သီးအစည်းအဝေးသည် ပင်လယ်ရေးရာပူးပေါင်းဆောင်ရွက်မှု၊ ရေရှည်တည်တံ့ခိုင်မြဲသောဖွံ့ဖြိုးတိုးတက်မှုနှင့် ဒေသတွင်းဆက်သွယ်ရေးတို့ကို အဓိကထားဆွေးနွေးမည်ဟုလည်း သိရသည်။