ရုံပြည့်အားပေးမှု ရရှိခဲ့သော ပြုစားရုပ်ရှင်ဇာတ်ကားကြီး Red Carpet Show
ရွှေမြန်မာရုပ်ရှင်ထုတ်လုပ်ရေးရဲ့ အချစ်နဲ့ ထိတ်လန့်ခြောက်ခြားဖွယ် ဇာတ်လမ်းပုံစံ “ပြုစား” ရုပ်ရှင်ဇာတ်ကားကြီး Red Carpet Show ပွဲအခမ်းအနားကို ဇန်နဝါရီ ၁၅ ရက် ညနေပိုင်းက ရန်ကုန်မြို့ သမ္မတ အဆင့်မြင့် ရုပ်ရှင်ရုံမှာ ကျင်းပခဲ့ရာ ပရိသတ်တွေရဲ့ ရုံပြည့်အားပေးမှုကို တစ်ခဲနက်ရရှိခဲ့တာပဲ ဖြစ်ပါတယ်။
အဆိုပါ ဇာတ်ကားကို ဇာတ်လမ်း လူညိုချောနဲ့ မယ်မင်းဘုံရေးသားပြီး ဇာတ်ညွှန်းနဲ့ ဒါရိုက်တာကိုလည်း မယ်မင်းဘုံက စုန်း၊ သရဲ၊ အချစ်၊ မိသားစုဇာတ်လမ်းပုံစံနဲ့ ပုပ္ပားဒေသဘက်မှာ ရိုက်ကူးပုံဖော်ထားတာလည်း ဖြစ်ပါတယ်။ သရုပ်ဆောင်တွေ ဖြစ်တဲ့ နေဝင်း၊ ရှိန်းတင်ထူး၊ စိုးမြတ်သူဇာ၊ ခိုင်နှင်းဝေ၊ ရတနာဗိုလ်၊ ခြူးလေးနဲ့ အနုပညာရှင်များစွာ ပါဝင်ထားကြပါတယ်။
“ပြုစား” ရုပ်ရှင်ဇာတ်ကားကြီးကို လာမယ့် ဇန်နဝါရီ ၁၇ ရက်မှာ မြန်မာတစ်ပြည်လုံးရှိ အဆင်မြင့် ရုပ်ရှင်ရုံတွေမှာ ရုံတင် ပြသမှာလည်းဖြစ်ပါတယ်။ ဒီရုပ်ရှင်ဇာတ်ကားကို အသက် ၁၃ နှစ်အောက် ကလေးတွေက မိဘနဲ့အတူ ကြည့်ရှုသင့်တာဖြစ်ပြီး ထိတ်လန့်ဖွယ်ရာဇာတ်ဝင်ခန်းတွေပါဝင်ပါတယ်။
