ဘီလူးချောင်းရေ မြင့်တက်မှုကြောင့် လွိုင်ကော်မြို့ရှိ ရပ်ကွက် (၄) ခုမှ ဒေသခံများအား ရေဘေးလွတ်ရာသို့ ပြောင်းရွှေ့
ဘီလူးချောင်းရေ မြင့်တက်မှုကြောင့် ကယားပြည်နယ်၊ လွိုင်ကော်မြို့ရှိ ရပ်ကွက် (၄) ခုအတွင်းသို့ ရေဝင်ရောက်လျက် ရှိသဖြင့် ၎င်းရပ်ကွက်များရှိ ဒေသခံပြည်သူများအား ရေဘေးလွတ်ရာသို့ ရွှေ့ပြောင်း ပေးလျက်ရှိကြောင်း သိရသည်။
ယနေ့ စက်တင်ဘာ ၁၇ ရက်နေ့တွင် လွိုင်ကော်မြို့ရှိ ဒေါနိုးကူးရပ်ကွက်၊ နမ့်ကွတ်ရပ်ကွက်၊ ရှမ်းစုရပ်ကွက်နှင့် မင်းစု ရပ်ကွက်တို့တွင် ရေဝင်ရောက်လာသဖြင့် ၎င်းရပ်ကွက်များရှိ ဒေသခံပြည်သူများအား မီးသတ်ဦးစီးဌာနမှ ဦးဆောင်၍ ရေဘေးလွတ်ရာသို့ ကူညီရွှေ့ပြောင်းပေးလျက်ရှိပါသည်။
ကယားပြည်နယ်မီးသတ်ဦးစီးမှူး ဦးဆောင်၍ ရှာဖွေကယ်ဆယ်ရေးတပ်ဖွဲ့ဝင်များမှ သက်ဆိုင်ရာ အဖွဲ့အစည်းများနှင့် ပူးပေါင်း၍ ရှာဖွေကယ်ဆယ်ရေးယာဉ်(၁)စီး၊ မီးငြှိမ်းသတ်ယာဉ်(၂)စီး၊ စက်လှေ (၅)စီးတို့ဖြင့် ရေဘေးသင့်ပြည်သူများအား ရေဘေးလွတ်ရာသို့ ကူညီရွှေ့ပြောင်းပေးခြင်းလုပ်ငန်းများ ဆောင်ရွက်လျက်ရှိကြောင်း သိရသည်။
