ရတနာပုံရိပ်ငြိမ် ဘုန်းတော်ကြီးသင်စာသင်ကျောင်းမှာ မွေးနေ့အလှူပြုလုပ်ခဲ့တဲ့ နေဆန်း
ပရိသတ်အားပေးမှုရရှိထားတဲ့ သရုပ်ဆောင် နေဆန်းရဲ့ ယနေ့ ဇွန်လ ၁၄ ရက်မှာကျရောက်တဲ့ မွေးနေ့အလှူအနေနဲ့ ရန်ကုန်မြို့ သင်္ဃန်းကျွန်းမြို့နယ်ရှိ ရတနာပုံရိပ်ငြိမ်ဘုန်းတော်ကြီးသင်စာသင်ကျောင်းမှာ အလှူအတန်းပြုလုပ်ခဲ့ပါတယ်။
“ကျွန်တော့်အနေနဲ့ ဒီနေ့မွေးနေ့မှာ သံဃာတွေနဲ့ စာသင်သား ၁၂၀ စာအတွက် နယူးချစ်တီးဒံပေါက်နဲ့ ပေါင်မုန့်တွေ လှူဖြစ်တယ်။ ဒီလို နှစ်စဥ်မွေးနေ့အလှူလေးအဖြစ် လှူဒါန်းလာခဲ့တာဆိုရင် ဒီနှစ်နဲ့ဆိုရင် ၁၃ နှစ်တိုင်ခဲ့ပြီလေ။ မွေးနေ့တိုင်မှာ အမြဲတမ်း အလှူအတန်းတွေလုပ်ရင်းဖြတ်သန်းရတာ ပီတိလည်းဖြစ်ရပါတယ်” လို့ သရုပ်ဆောင် နေဆန်းကပြောပါတယ်။
သူဟာ မွေးနေ့အလှူအနေနဲ့ ရတနာပုံရိပ်ငြိမ် ဘုန်းတော်ကြီးသင်စာသင်ကျောင်းမှာ သံဃာတွေနဲ့ စာသင်သား ၁၂၀ စာအတွက် နယူးချစ်တီးဒံပေါက် နဲ့ ပေါင်မုန့်တွေလှူဒါန်းခဲ့တဲ့အပြင် ဒံပေါက်ပွဲ ၈၀ ကိုလည်း သွားရာ လမ်းတစ်လျှောက်ကြုံတဲ့သူတွေကို မွေးနေ့ကုသိုလ်အဖြစ်လှူဒါန်းခဲ့ပါတယ်။
သရုပ်ဆောင် နေဆန်းဟာ တစ်ချိန်က ရုပ်ရှင်ဇာတ်ကားတွေကြောင့် ပရိသတ်ချစ်ခင်မှုများစွာရရှိထားသလို လက်ရှိအချိန် ထိလည်း ရုပ်ရှင်ကားတချို့နဲ့ ဇာတ်လမ်းတွဲ တချို့ကြောင့် ပရိသတ်ချစ်ခင်မှုကို ရရှိထားတာလည်းဖြစ်ပါတယ်။ သူဟာ ကိုယ်ပိုင်စီးပွားရေးအနေနဲ့ “နယူးချစ်တီး” ထမင်းဆိုင်ကိုလည်း ဦးဆောင်နေသူ ဖြစ်ပါတယ်။
